Pastilan Pagka Reklamador!

 

Ginoo: Pastilan, unsa kahay maayo, magpalansang ko ug balik sa krus?

Pastilan. Obserbasyon lamang no. Kahilig jud nato ug reklamo.

1. Reklamo sa gobyerno kay kurakot, pero inig eleksyon magpapalit pud sa boto. Wala kunoy mapili. Pangutana, ngano man? Kay ang mga buutan, di man managan, kay di man pud botohan sa mga tawo kay way kwarta. Unya kaning ubang tawo nga nawong ug kwarta, maoy una moreklamo! Asa man bawi-on aning mga politiko ang ila nagasto, abir? Ayaw na papalit, para kaning mga politiko, dili na kinahanglan mamawi sa nagasto. Ayaw reklamo, kay gi-ani ra nimo ang imo gitanom! Ang-ang mu-ani ka ug mangga kung nagtanom kay ug bayabas!

2. Reklamo mahal pamaliton pero bisan pagtanom na lamang ug kamatis sa masatira dili makahimo. Sus pastilan, bisan ba tanglad paliton pa sa merkado?

3. Reklamo baha. Aw na-a may natural nga baha, pero naa poy binuhatan nato mismo. Sige man pataka panglabog basura ug pamutol ug kahoy! Di man kinahanglan naay muhakot ug basura ba, isegregate na, irecycle....mokita paka sa bildo, sa papel, sa plastic. Sus, sauna nga panahon, wala may tighakot, nganong limpyo man? Na hala padayun sa gibuhat kung gusto mulangoy sa baha.

4. Reklamo walay trabaho. Aw naa man jud pagkuwang ang gobyerno, pero daghan man jud matrabaho ba kung gustuhon. Saon man mas gusto man tulog tulog na lamang, internet internet na lamang, inom inom na lamang. Sus, samot gasto, hinu-on nga makatabang. Pananum, bisan sa masatira na lamang, di ba, di naka kinahanglan mogasto pa ug palit sa uban lamas sa merkado. Dako ang kala-inan sa kugihan sa tapulan!

5. Reklamo mahal kuryente. Na ang uban ana wa natay mahimo, pero sa kaugalingon naa. Ayaw na usik usik ug kuryente. Na hinuon sige usik usik ug kuryente, sige way undang tv tanaw telenovela, way undang kuryente sige duwa sa computer... na hala, ayaw na undangi di ba taas ug samot imo kunsumo.

6. Reklamo walay kuarta. Wa kunoy pang palit bugas kay mahal na, pero naa ikapalit cellphone ug naay ikapangload pirme sa cellphone. Imbes mangitag panginabuhian, sige man nuon marites sa facebook, tiktok ug youtube. Samot mawad-an kuarta, imbes matigom aw gipalit pirme ug load, unya hasta kuryente taas kay siyempre imo manang i-charge ang cellphone. 

7. Reklamo sa programa sa Gobyerno. Wala na lamang gyuy makitang maayo. Pastilan, naa gani bag-o nga programa, hala da-uton dayun, di na lamang jud makasuporta, wala pa gani makasabot sa tibuok ekplanasyon.

8. Reklamo sa igsoon, sa iyaan, sa inahan, sa amahan, kay hakog kuno. Sus Pastilan! Maghulat ra diay ug allowance? Unya libakon pa! Kahayahay ba sa kinabuhi. Ang iyaan, inahan, amahan perte nang kayod sa gawas sa nasud, unya ang mga anak, pag umangkon ug kaparyentehan sige inom inom sa gipadala. Di man tanan no, pero kasagaran mao jud ni ang nahitabo. Na hala, magpadayun ta sa makalilimos nga mentalidad, wala jud tay kaugmaon.

Mao ni, reklamo sa tanan, pero sa kaugalingon walay gihimo! Na hala, kitay mag igo, magpadayun ta ani nga pamatasan, ambot kung asa ta ani puniton.

PS: Naay valid nga reklamo la-in kini sa puro ra reklamo.

Read in Tagalog: Hay Nako Napakareklamador!

Read in Cabalianon:  Pastilan Pagkareklamador!

by aats